Халқаро Жиноий Полиция Ташкилоти – Интерпол Бош Ассамблеясининг 90-сессияси якунланди
21 октябрь куни Ҳиндистоннинг Ню-Деҳли шаҳрида Халқаро жиноий полиция ташкилоти Интерпол Бош Ассамблеясининг 90-сессияси ўз ишини якунлади. Ушбу муҳим тадбирда Интерполга аъзо 166 давлатдан 1000 дан ортиқ делегатлар, жумладан, 85 нафар полиция бошлиғи ва 40 дан ортиқ ички ишлар вазирлари иштирок этди. Бош Ассамблея тасдиқланган кун тартибига мувофиқ бўлиб ўтди, унда Европадан вице-президент ва Африкадан делегат лавозимларига Интерпол Ижроия қўмитасига сайловлар бўлиб ўтди. Овоз бериш жараёнида ушбу лавозимларга қуйидагилар сайланди: жаноб Питер де Бушер (Peter DE BUYSSCHER), Биринчи бош суперинтендант, Бельгия Федерал полициясининг Халқаро ҳамкорлик департаменти директори ва жаноб Алаа Эл Дин Мухамед Абдала Рагаб (Alaa EI Din Mohamed Abdalah RAGAB), генерал, Интерпол Қоҳира/Миср ММБ раҳбари, AFRIPOL Миллий алоқа идораси раҳбари.
Бундан ташқари, молиявий жиноятлар ва коррупцияга қарши курашиш бўйича ҳамкорликдаги ҳаракатларни кучайтиришга, Интернет саҳифаларида жойлаштирилаётган болаларга нисбатан жинсий зўравонлик ҳолатларини аниқлаш ва текшириш, янги INTERPOL I-Familia маълумотлар базасидан оптимал фойдаланиш орқали бедарак йўқолган шахсларни аниқлаш каби масалаларга қаратилган қатор қарорлар қабул қилинди, 2023 йилга мўлжалланган бюджет лойиҳаси ишлаб чиқилди, ташкилот аъзолик тўловларининг янги ҳажми ва 2024-2025 йилларга мўлжалланган стратегик режаси, шунингдек, Интерполнинг 100 йиллигини нишонлаш бўйича режалар тузилди.
Бош Ассамблея сессияси Ҳиндистон ички ишлар вазири Амит Шоҳнинг сўзлари билан якунланди: «Ўтган юз йил ичида Интерпол 195 давлатни бирлаштирган ва бутун дунё бўйлаб жиноятчиликка қарши курашда жуда муҳим роль ўйнайдиган йирик ва самарали платформага айланди. Бугунги кунда жиноятчилик чегара билмай қолди. Агар биз буни тўхтатмоқчи бўлсак, унда одатдаги чегараларимиздан ташқарини ҳам ўйлашимиз керак». Кейин у келаси йил Австрия пойтахти Вена шаҳрида Интерпол Бош Ассамблеясининг 91-сессияси бўлиб ўтадиган мамлакат – Австрия делегацияси раҳбарига Интерпол байроғини топширди. Бундай муҳим воқеани ўтказиш жойини танлаш 1923 йил 7 сентябрда II Халқаро Жиноий Полиция Конгрессида штаб-квартираси Вена шаҳрида бўлган Халқаро Жиноий Полиция Комиссияси ташкил этилганилиги билан боғлиқ.
Интерполнинг Ўзбекистон Республикасидаги ММБ
