Телеграмдаги "Ютуқли ўйин"лардан эҳтиёт бўлинг ёхуд яна бир фирибгарлик ҳолати
Сурхондарё вилояти Термиз шаҳрида яшовчи фуқаролар Р.М. ва У.С.лар Телеграм мессенжеридаги "Ютуқли ўйин" гуруҳи администратори томонидан уларга келган "Samsung A53" соҳибига айландингиз, ютуқни қўлга киритиш учун почта пулини тўланг ва уни кутиб олинг" деган хабарга ишониб, юборилган банк картасига 200.000 сўм ўтказиб беришганлигини, аммо ушбу аккаунт уларни блоклаб қўйганидан сўнг фирибгарлик қурбони бўлишганликларини тушуниб, ИИБга мурожаат қилишган.
Олиб борилган тезкор-қидирув тадбирлари натижасида, ушбу жиноятни Сурхондарё вилояти Термиз шаҳрида яшовчи, 1999 й.т., муқаддам фирибгарлик жинояти учун судланган, Р.Д. содир этганлиги, шунингдек, у бошқа шахсларнинг ҳам пулларини ушбу тарзда талон-торож қилиб келганлиги аниқланган.
Р.Д.га нисбатан ЎзР ЖКнинг 168-моддаси 3-қисми билан жиноят иши қўзғатилиб, ҳибсга олинган ва тергов ҳаракатлари олиб борилмоқда.
ИИВ Киберхавфсизлик маркази
