«Solo Travel Safety Report – 2019» рейтингида Ўзбекистон бешинчи ўринни эгаллади
Дунё мамлакатларидаги ривожланиш жараёнлари турли йўллар билан таҳлил қилиб борилади. Хусусан, «The Economist» (EIU) журналининг 1946 йилда асос солинган аналитик бўлими – «The Economist Intelligence Unit»нинг асосий мақсади мамлакатлар, халқаро ташкилотлар ҳамда йирик трансмиллий коорпорациялар учун бизнесни таҳлил қилиш ҳисобланади.
Албатта, бизнес барқарорлигини таъминлаш, мамлакатда тадбиркорликни йўлга қўйиш учун, биринчи навбатда, инвестиция киритилаётган давлатдаги тинчлик муҳим аҳамиятга эга. «Economist Intelligence Unit» ташкилоти ҳар йили мамлакатларнинг тинчлик бўйича Глобал индексини (Бу индекс дунёдаги тинчликни, давлат ичидаги зўравонлик даражаси ва ташқи сиёсатининг тажовузкорлигини ўлчайдиган кенг қамровли кўрсаткичдир) эълон қилиб келади. Ўзбекистон 2005 йилда 163 мамлакат ўртасида 113-ўринни эгаллаган бўлса, 2019 йилда эса 102-ўринга кўтарилди. Қўшни мамлакатлар билан ўрнатилган яхши қўшничилик муносабатлари, чегаралар очиқлиги баробарида бу кўрсаткичнинг ижобий тарафга ўзгариб бориши мамлакатимизда олиб борилаётган ислоҳотлар мустаҳкам асосга эга эканлигидан далолат беради.
Яқинда «Wegoplace» онлайн саёҳат хизмати 2019 йилда ёлғиз ҳолда саёҳат қилувчилар учун энг хавфсиз бўлган «Solo Travel Safety Report – 2019» ҳисоботини эълон қилди.
Мутахассислар 142 мамлакат аҳолиси ўртасида сўровнома ўтказишди. Саволлар эса аҳолининг маҳаллий полицияга бўлган ишончи, тунги вақтда шаҳар атрофидаги хавфсизлик, сайёҳлар учун турли кўнгилсизликлар, талон-торож қилиш каби ҳолатларнинг мавжудлиги ёки йўқлигидан келиб чиққан ҳолда тузилди.
Бу рўйхатда Сингапур (97 та) энг юқори хавфсизлик индексига эга эканлиги маълум бўлди. Ундан кейин Норвегия, Исландия ва Финляндия (ҳар бирида 93 та). Қувонарлиси, рейтингда бешинчи ўринни Ўзбекистон (91 та) эгаллаган. Шубҳасиз, бу юртимиз аҳолиси ҳамда мамлакатимизга ташриф буюрган сайёҳларнинг ички ишлар органлари тизимида хавфсизликни таъминлаш ишига, хавфсиз туризм соҳасига берилган юксак эътирофдир.
Кейинги ўринларда Гонконг (91), Швейцария (91), Канада (90), Индонезия (89) ва Дания (88) қайд этилган.
Бундан ташқари, мутахассислар ёлғиз саёҳатчилар учун энг хавфли мамлакатлар рейтингини ҳам туздилар. Улар орасида Венесуэла (44 та), Aфғонистон (45) ва Жанубий Судан (54) «пешқадам»ликни қўлга киритди.
Гиёҳванд моддалар ва халқаро жиноятчиликка қарши курашда глобал етакчи ҳисобланган БМТнинг Гиёҳванд моддалар ва жиноятчилик бўйича бошқармаси 1997 йили Ташкилотнинг Наркотикларни назорат қилиш дастури ва Халқаро жиноятчиликнинг олдини олиш маркази бирлашиши натижасида юзага келган.
Мазкур халқаро ташкилотнинг аниқлаши бўйича мамлакатлар мезони сифатида ҳар бир мамлакат учун 100 минг кишига тўғри келадиган қотилликлар сони ишлатилган. Бу рейтингда Ўзбекистон 2019 йилда 207 та давлат орасида 83-ўринни эгаллади.
Оғир ва ўта оғир турдаги жиноятларнинг камайиши мамлакатимизга сайёҳлар оқимини кенгайтириши билан бирга, юртимизда ўз бизнесини йўлга қўйган ҳолда, қўшимча иш ўринларини яратишни режалаштираётган инвесторлар учун ҳам ижобий хулоса чиқаришга асос бўлади.
ИИВ Ахборот хизмати
