Олов билан олишиб. Сайхунободлик профилактика инспектори ёнғинни ўчиришда фидойилик кўрсатди
Йўриқномадан сўнг лейтенант Фаррух Абдуназаров машинасида ўз ҳудуди томон кетаркан, йўл-йўлакай ўйга толди. Мана, икки йилдирки, Сайхунобод туманининг «Ўзбекистон» маҳалласида профилактика инспектори бўлиб хизмат қиляпти.
Рости, ички ишлар органлари сафига кириш орзусида юрганида, зиммасига бу даражада катта масъулият юкланишини билмаганди. Ахир, ҳудуддаги криминоген вазиятни назорат қилиш, жиноятга мойил инсонлар билан ишлашнинг ўзи бир тараф, аҳоли муаммоларини ўрганиш, низоли оилалардаги жанжалларни бостиришнинг ўзи бир тараф.
Маҳаллага етганида уни оқсоқол кутиб турарди. Улар хонадонма-хонадон юришлари керак. Маҳалладаги салкам 3500 аҳолидан ҳар бирининг ўз ташвиши бор. Ҳар бирига қулоқ тутиш керак, ҳар бирининг муаммосини ҳал этиш зарур. Улар маҳалланинг қуйироқдаги мавзесига кириб боришганида кун чошгоҳга етганди. Тўрт-беш оиланинг ҳолидан хабар олишга улгурмай, Фаррухнинг телефони жиринглади.
— Алло, Фаррухжон, ёрдам беринг! Уйим ёнаяпти!..
Телефон қилаётган аёл маҳаллада яшовчи 1-гуруҳ ногирони Анвар Ярмановнинг турмуш ўртоғи. Оила ижтимоий ҳимояга муҳтож. Профилактика инспектори сифатида бу хонадонда кўп бўлган, ҳомийлар кўмагида ёрдам кўлини чўзган. Оила бекаси профилактика инспекторини яхши танигани боис биринчи бўлиб унга қўнғироқ қилган экан. Фаррух тезда ёнғин хавфсизлиги хизматига қўнғироқ қилди. Кейин маҳалла раиси билан машинасига ўтириб, кўмакка шошилди.
«Обиҳаёт» кўчасига яқинлашишар экан, узоқдан бурқсиган қора тутун кўзга ташланди. Фаррух етиб келиши билан ёрдамга отилди. Кўшнилар эндигина сув ташишар, ёнғин ошхонанинг томига ўта бошлаганди. Шифер тагидан оловнинг қизил тили ялт-ялт кўзга ташланиб турарди. Уй бекасининг фиғони фалак. Ҳеч кимнинг томга чиқишга юраги бетламасди. Фаррух ўйлаб ўтирмай, нарвон ёрдамида томга чиқди. Унга челакни узатишди. Челаклар қўлма-қўл бўлиб етиб келар, у бир уринишдаёқ сувни сепиб бўшатарди. Олов юз-кўзларига урилар, қошлари, сочлари куйганини ҳис қилиб турарди. Лекин чекинишни ҳаёлига ҳам келтирмасди.
Жонсарак инспектор оловни ўчириб, пастга тушганида, аъзойи бадани қизиб кетган, тинимсиз тер оқарди... Уй эгалари халоскор ходимга миннатдорлик кўзлари билан термулишар, бошқа сўзга ҳожат йўқ эди...
Абдураҳмон МУСТАФОҚУЛОВ, «Postda» мухбири.
Сирдарё вилояти.
